Մեսրոպ Մաշտոց համալսարանի գրադարանը հանդես է գալիս, որպես գիտական կենտրոն. բուհում նշվել է գրադարանավարի օրը
Մեսրոպ Մաշտոց Համալսարանում այսօր կազմակերպվել է միջոցառում՝ նվիրված Գրադարանավարի աշխատողի տոն օրվան:
Բացման խոսքով հանդես է եկել բուհի ռեկտոր Դոնարա Գաբրիելյանը: Նա շնորհավորել է գրադարանավարների տոն օրը և նշել, որ ոլորտի աշխատակիցները կարևոր և պատասխանատու առաքելություն են իրականացնում: 
Ըստ բուհի պրոռեկտոր Ալիսա Բաղդասարյանի՝ յուրաքանչյուր մարդ պետք է գրքեր շատ ընթերցի, քանի որ գրքերը մեծ ազդեցություն են ունենում մարդու զարգացման գործում: Իսկ ամենաշատ գրքերը կարող են գտնվել գրադարաններում, որտեղ աշխատում են բարյացակամ գրադարանավարներ:Ա. Բաղդասարյանը ևս շնորհավորել է գրադարանավարների տոն օրը և մաղթել խաղաղություն, բեղմնավոր աշխատանք և հաջողություններ:
ՄՄՀ գրադարանի նախկին վարիչ Ռոմելա Անդրյանը՝ միանալով շնորհավորանքներին՝ իր խոսքում անդրադարձել է գրադարանի ստեղծման առաջին քայլերին:Ռ. Անդրյանը տարիներ շարունակ մեծ պատասխանատվությամբ է իրականացրել իրեն վստահված աշխատանքը: Հիշում է՝ սկզբնական շրջանում գրադարանի գրքային ֆոնդը բավականին քիչ էր, իսկ այսօր այն հատել է քսան հազարի սահմանը:
ՄՄՀ գրադարանի ներկայիս վարիչ Լաուրա Առստամյանի խոսքով՝ աշխատում են գրադարանային ծրագրով, որտեղ մուտքագրված է գրադարանի հայկական գրքային ֆոնդից 2000 միավոր գիրք. գործընթացը շարունակվում է:
Լ. Առստամյանը տեղեկացրել է, որ ընթացիկ տարում ընդհանուր գրքային ֆոնդը դասակարգել են ըստ գրադարանային մատենագիտական դասակարգման աղյուսակների. մի մասը տեղափոխել են ամբիոններ և կովկասագիտության կենտրոն, որպեսզի անմիջական դասերի ընթացքում ուսանողները կարողանան օգտվել:
Գրադարանավարուհի Կարինե Ղուլյանն իր ելույթում ասել է, որ ՄՄՀ-ի կարևոր խնդիրներից է գրադարանային հավաքածուի համալրումը գիտաուսումնական գործընթացնրին համապատասխան: Էլեկտրոնային տեղեկատվության ապահովումը կատարվում է գրադարանում առկա և համացանցի միացված համակարգիչների միջոցով: 2011 թվականից մշակվել է ՛՛Տեղեկատու-որոնողական՛՛ համակարգի էլեկտրոնային տարբերակը: Էլեկտրոնային քարտարանը ներառում է գրադարանի ուսումնական գրականությունը, ամսագրերը: Էլեկտրոնային քարտարանում մուտքագրված գրականությունը երեք լեզուներով է՝ հայերեն, ռուսերեն և անգլերեն:
Ելույթներով հանդես են եկել նաև բանաստեղծ, ՄՄՀ դասախոս Սոկրատ Խանյանը, Կովկասագիտության կենտրոնի ղեկավար Հովիկ Ավանեսովը, համալսարանի ուսանողները, ովքեր շնորհավորել են գրադարանավարների տոն օրը և շնորհակալություն հայտնել նրանց հոգատար վերաբերմունքի ու հետևողական աշխատանքի համար:Մեսրոպ Մաշտոց Համալսարանի մամուլի ծառայություն
Previous
Next