Մեսրոպ Մաշտոց Համալսարանում տեղի է ունեցել առաջին կուրսեցիների երդման արարողություն
Այսօր՝ սեպտեմբերի 3-ին, Մեսրոպ Մաշտոց Համալսարանում տեղի է ունեցել առաջին կուրսեցիների երդման արարողություն:
Այս տարի Մեսրոպ Մաշտոց Համալսարան է ընդունվել 230 ուսանող, այդ թվում` 134-ը սովորում է առկա բաժնում, իսկ 96-ը` հեռակա:
Մինչ միջոցառումը՝ ներկաները ծաղիկներ են խոնարհել Արցախյան ազատամարտում զոհված ուսանողների հիշատակը հավերժացնող հուշատախտակին. 2016 թվականի ապրիլյան քառօրյա պատերազմի ժամանակ բուհն ունեցել է 4 զոհ, իսկ 2020 թվականի Արցախյան երրորդ պատերազմի ժամանակ՝ 15:
Previous
Next
Բուհի ռեկտոր Դոնարա Գաբրիելյանը՝ ողջունելով առաջին կուրսեցիներին, իր խոսքում ընդգծել է, որ տեսական գիտելիքների և հմտությունների ձեռքբերումը կարևոր նախապայման է յուրաքանչյուր ուսանողի համար:Դ. Գաբրիելյանը հորդորել է ուսանողներին՝ լինել ակտիվ, պարտաճանաչ, մրցունակ, նախաձեռնող և, իհարկե, ուսման մեջ առաջադեմ:
Համալսարանի պրոռեկտոր Ալիսա Բաղդասարյանը՝ նոր ուսումնականի առթիվ շնորհավորելով առաջին կուրսեցիներին, ասել է, որ այս ժամանակահատվածում յուրաքանչյուր ոք պետք է զինված լինի գիտելիքներով, որպեսզի կարողանա դիմակայել այն մարտահրավերներին, որոնք ծառացած են երկրի առաջ:Գրագետ, հմուտ, զարգացած և պատասխանատու լինելը, մեր օրերում, պահանջված և անհրաժեշտ նախապայմաններից է: Գիտելիքը մեր դարաշրջանի հաղթաթուղթն է: Պետք է շարունակաբար ինքնակրթվել և զինվել նոր գիտելիքներով:
Միջոցառման ընթացքում հումանիտար ֆակուլտետի դեկան Արինա Գրիգորյանն առաջին կուրսեցիներին է հանձնել ուսանողական տոմսերն ու ստուգարքային գրքույկները։Ուսանողների երդմնակալությանը ներկա էին նաև համալսարանի պրոֆեսորա-դասախոսական անձնակազմը, համալսարանականներ, հյուրեր:
Մեսրոպ Մաշտոց Համալսարանի մամուլի ծառայություն
Previous
Next