Հուշ-ցերեկույթ՝ ի հիշատակ Արցախյան երրորդ պատերազմում անմահացած քաջորդիների

Մեսրոպ Մաշտոց Համալսարանի հայոց լեզվի և գրականության ամբիոնի վարիչ Ռուզաննա Սաիյանի նախաձեռնությամբ բուհում կազմակերպվել է հուշ-ցերեկույթ՝ ի հիշատակ Արցախյան երրորդ պատերազմում անմահացած քաջորդիների:

Մեսրոպ Մաստոց համալսարանն այս պատերազմի ընթացքում ունեցել է 15 զոհ, իսկ 2016 թվականին՝ 4:

Միջոցառումը սկսվել է լռության րոպեով, որին ներկա էին բուհի պրոֆեսորադասախոսական կազմը՝ ի դեմս ռեկտոր Դոնարա Գաբրելյանի, ուսանողներ, լրագրողներ:

Հուշ-ցերեկույթին բացման խոսքով հանդես է եկել Դոնարա Գաբրիելյանը, ով իր զորակցությունն է հայտնել բոլոր այն ընտանիքներին, ովքեր չարաբաստիկ պատերազմի հետևանքով կրել են մարդկային և նյութական թանկ կորուստներ:

«Արցախը եղել ու այսօր էլ շարունակում է հանդիսանալ Մայր Հայաստանի ամուր դարպասը: Չնայած ապրում ենք դժվարին ու շատ ծանր օրեր, բայց լիահույս ենք, որ կկարողանանք համախմբվել մեկ գաղափարի շուրջ և նորից հետ վերցնել բերդաքաղաք Շուշին ու Հադրութը: Արցախը կա, ապրում է, և դեռ ապրելու է շնորհիվ հազարավոր հայորդիների, ովքեր չխնայեցին իրենց կյանքը հանուն հայրենիքի: Մենք պարտավոր ենք հիշել նրանց՝ անուն առ անուն»,- մասնավորապես ասել է բուհի ռեկտորը:

Հիշատակի միջոցառմանը ՄՄՀ ուսանողները հանդես են եկել հայրենասիրական երգերով և ասմունքով: Ելույթներով հանդես են եկել նաև համալսարանի պրոռեկտոր Ալիսա Բաղդասարյանը, բանասիրական գիտությունների դոկտոր Սոկրատ Խանյանը և Կովկասագիտության կենտրոնի ղեկավար Հովիկ Ավանեսովը: Նրանց խոսքով՝ հայրենիքը պետք է սիրել ոչ թե խոսքով, այլ գործով, որն ապացուցել են հազարավոր անմահ հերոսներ: Իսկ ապրողներս, պարտավոր ենք շարունակել նրանց կիսատ թողած գործը:

Միջոցառման վերջում ներկաները ծաղիկներ են խոնարհել բուհի՝ զոհված շրջանավարտների հիշատակին բացված հուշատախտակին: