Կովկասագիտության կենտրոնի գիտակրթական 6-ամյա գործունեության վերաբերյալ տեղի է ունեցել մամուլի ասուլիս

 

Կովկասագիտության կենտրոնը Մեսրոպ Մաշտոց համալսարանում գործում է 2015 թվականից՝ Ղարիբ Բաբայանի նախաձեռնությամբ:

 

Կենտրոնի ղեկավար Հովիկ Ավանեսովի խոսքով՝ սկզբնական շրջանում չկային համապատասխան մասնագետներ, ինչպես նաև անհրաժեշտ գրականություն: Կարճ ժամանակահատվածում բուհի մասնագետների ուժերով հավաքագրվել են անհրաժեշտ նյութերը և այն ի մի բերել գրքերի տեսքով: Ուսանողներն այժմ ապահովված են անհրաժեշտ գիտական գրականությամբ, տեղեկատվական բազայով և տեխնիկայով:

 

 

Կենտրոնն աջակցում է Արցախի, Հայաստանի և տարածաշրջանի զարգացման առավել արդիական խնդիրներին նվիրված միջազգային գիտաժողովների կլոր սեղանների կազմակերպմանը:

 

Բուհի ռեկտոր Դոնարա Գաբրիելյանն իր խոսքում նշել է, որ բուհի անձնակազմը պատրաստակամ է համագործակցել ցանկացած այլ համալսարանի կամ կենտրոնի հետ, ինչպես նաև ցուցաբերել մասնագիտական օժանդակություն: Կովկասագիտության կենտրոնը հանդիսանում է նախկինում գործող հայագիտական հետազոտությունների և ռազմավարական հետազոտությունների կենտրոնների իրավահաջորդը:

 

Կենտրոնի ուսանողները սովորում են նաև ադրբեջաներեն և պարսկերեն: 24 շրջանավարտների մի մասն աշխատում է պետական կառույցներում:

 

Դոնարա Գաբրիելյանն ուրախությամբ է նշել, որ Արցախի մայր բուհում վերջերս բացվել է տարածաշրջանային լեզուների ուսուցման կենտրոն, սակայն արդարացի չի համարում տարածված այն լուրը, որ Արցախում նման կենտրոնի բացումը ներկայացվում է որպես առաջինը:

 

Կոնտրոնի ղեկավարն ասուլիսի ժամանակ անդրադարձել է նաև այն մասին, որ ՄՄՀ Կովկասագիտության կենտրոնը տարածաշրջանային բուհերի և տարածաշրջանային այլ գիտահետազոտական կենտրոնների հետ համատեղ պատրաստում և հրատարակում է ռեգիոնալ թեմաներով ժողովածուներ: